كسرت وفاء مصطفى، زوجة لاعب بيراميدز ومنتخب مصر مصطفى محمد زكي “زيكو”، صمتها لترد على موجة الانتقادات التي طالتها مؤخرًا. جاء ذلك بعد تداول مقطع فيديو لها اعتبره البعض إساءة لوالدة اللاعب، التي كانت قد عبرت عن شعورها بالإهمال في تصريحات إعلامية. وأكدت وفاء أن الفيديو كان مجرد مزاح بينها وبين زوجها، وأنها لم تكن قد شاهدت حلقة والدة “زيكو” حينها.
عبر حسابها على إنستجرام، أوضحت وفاء مصطفى: “أولًا أنا مش مضطرة أطلع أبرر أي حاجة من دي علشان فعلاً ربنا اللي يعلم بنية كل الناس، بس بجد الناس أخذت الفيديو بتاعي بطريقة وحشة جدًا وأنه على مامت زيكو وإن أنا كدا بضايقها ومن ساعتها نازلين فيا شتيمة. أنا أصلاً معملتش أي حاجة والله، دا كان فيديو عادي مش أكثر من ضحك وهزار بيني أنا وجوزي وأصلاً مكنتش شوفت حلقة مامته لسه ولا عرفت أي حاجة. أنا نزلته هزار علشان الكومنتات بتاعت البنات اللي بتجيلي وإنهم بيحبوه ومعجبين بيه، وكانت صيغة هزار والله بس مش أكتر”.
وأضافت: “ثانيًا هي زي أمي، واللي أنا مش هقبله على أمي مش هقبله عليها أصلاً. أنا بالنسبالي الراجل اللي مش بيتقي ربنا في أمه عمره ما هيتقي ربنا في مراته ولا في أولاده، لأني مقتنعة إن مفيش أغلى من الأم في الدنيا. أنا كمان أم، وعايزة أقول إنها عمرها ما تتقارن بحد حتى لو أنا، هي ليها مكانتها الخاصة وأنا ليا مكانتي”.
تصريحات والدة زيكو
تأتي هذه التوضيحات بعد أن تحدثت والدة “زيكو” في برنامج “صبايا الخير”، قائلة: “زيكو مكانش بيطيق حد يقول لي كلمة أو يزعلني. أنا فرحانة بالمكانة اللي هو فيها، بس الكرة أخذته مني كثيرًا، لكنها وظيفته، وهو وحشني جدًا، ولم يأتِ لي حتى الآن بعد العودة من أمريكا، بسبب الاحتفالات. كل شوية يتواصل معي هاتفيًا، لكن الاحتفالات واخدة منه. زيكو فضّل عمله عن الحياة الأسرية، وأي لاعب مثله”.
وتابعت: “اتصلت به وقلت له نفسي أروح الاستاد وأقابلك هناك طالما مش فاضي تيجي، قال لي هتبقى بهدلة وناس كتير. أقوله طب هتيجي إمتى؟ يقول لي هخلص الاحتفالات وهجيلك. أنا كنت في حياته رقم واحد، ودلوقتي مراته بقت رقم واحد وأنا رقم اثنين”.
واختتمت الأم حديثها: “راضية وقابلة، أنا متحضرة ومتعلمة، لست جاهلة. هو راجع على احتفالات ولقاءات، وكان يحضر نفسه، لكن أنا فرحانة بيه، ده ابني وأنا اللي ربيته”.
